Кызыл җир суалчаннарының яңгырдан соң җир өстенә юлларга, асфальтка чыгуына кешеләр күптән игътибар иткәннәр һәм бу гадәтләре өчен аларны яңгыр суалчаннары дип атаганнар. Яңгыр суалчаннары җир өстендәге чери башлаган яфрак, үлән, үсемлек калдыкларын җир астына үз ояларына ташыйлар. Бу — алар өчен азык. Суалчаннар, туфракны казып, аны көпшәкләндерәләр һәм үсемлекләр өчен кирәкле дым һәм һаваның туфракка керүенә булышлык итәләр. Шуңа күрә яңгыр суалчаннарына кешеләрнең булышчылары итеп карарга һәм аларны сакларга кирәк!